नित्य नूतन हिंडावे,उदंड देशाटन करावे  - समर्थ  रामदास स्वामी
                                                                                                             अपार सिंधुच्या भव्य बांधवा, महाराष्ट्र देशा
                                                                                                             सह्याद्रीच्या सख्या,जिवलगा महाराष्ट्र देशा
                                                                                                             मंगल देशा पवित्र देशा महाराष्ट्र देशा
                                                                                                             राकट देशा , कणखर देशा, दगडांच्या देशा , 
                                                                                                             नाजूक देशा, कोमल देशा, फुलांच्याही देशा, 
                                                                                                             प्रणाम घ्यावा माझा हा श्री महाराष्ट्र देशा

              महाराष्ट्राचे इतके सुंदर वर्णन अजून काही असूच शकत नाही. आपल्या अमर्याद शब्द सामर्थ्याच्या जोरावर कवी गोविंदाग्रज ह्यांनी समग्र महाराष्ट्राचे विविध रंगांचे केलेले वर्णन केवळ विलोभनीय. महाराष्ट्र खऱ्याखुऱ्या अर्थाने विविध रंगांनी नटलेले राज्य. कुठे डोंगराला गड किल्ल्याचे कोंदण,तर कुठे डोंगरात लेण्यांचे कोरीव काम, कुठे देवळातील मांगल्य,तर कुठे योद्ध्यांच्या शौर्यकथा तर कुठे निसर्गाची मुक्त उधळण !!!!!!
              महाराष्ट्रात प्रत्येक ठिकाणाची स्वत:ची अशी खास ओळख आहे. आपल्या  ह्या कणखर राज्याची इतिहासपर्यंटन ओळख सर्वसामान्य पर्यटकांना करून द्यावी हा उद्देश डोळ्यासमोर ठेऊन आम्ही " दुर्ग भरारी " हे  संकेतस्थळ सुरवात करत आहोत. संकेतस्थळाचा प्रमुख उद्देश महाराष्ट्राचे वैभव असलेले गड-किल्ले आणि लेणी, पारंपारिक देवस्थाने आणि स्मारके, निसर्गाची मुक्त उधळण असणारे समुद्रकिनारे आणि धबधबे ह्यांची माहिती उपलब्ध करून द्यावी हा आहे.
                    माझा जन्म मावळातला,दारात उभे राहिले कि तुंग,तिकोना,लोहगड,विसापुर,मोरगिरी हे पाचही  किल्ले एका दमात द्रुष्टीस पडणारे.कुठेही गेल्यास सहजपणे घडणारी कार्ला,भाजे,बेडसे, भंडारा या लेण्यांची तसेच वाघेश्वर, कोंडेश्वर या हेमाडपंथी मंदिराची वारी.या सर्व गोष्टीमुळे मला लहानपणापासून हिंडण्याचा छंद लागला आणि वयाप्रमाणे तो वाढतच गेला व शिक्षणामुळे त्याला इतिहासाच्या अभ्यासाची जोड मिळाली.
              महाराष्ट्र म्हणजे पर्यटकांचे नंदनवन. रायगड-राजगड या सारखे बेलाग गिरिदुर्ग तर जंजिरा-सिंधुदुर्ग यासारखे अजिंक्य जलदुर्ग,अजंठा-वेरुळसारखी अद्वितीय लेणी,कोकणातील गूढरम्य मंदिरे, समुद्रकिनारे, मऊसुत वाळूच्या पुळणी आणि घनदाट झाडी,पावसाळयात सहयाद्रीकडून कोकणात झेपावणारे धबधबे,माथेरान-आंबोली यासारखी गिरिस्थाने आणि इतरही बरेच काही इथे फिरण्यासारखे,पहाण्यासारखे आहे.
                काळ बदलला,जीवन बदलले,कालानुरूप जीवन गतिमान झाले.माणुस दिवसेंदिवस निसर्गापासून दूर जात आहे.निसर्गाची ओढ प्रत्येकाला असतेच.परंतु दैनंदिन व्यवहाराच्या रुक्ष चाकोरीतून निघून निसर्गाचा आस्वाद घेणे मनात असुनही शक्य होत नाही.तरीही त्यातल्या त्यात आपण वर्षातुन एक-दोनदा तरी राहत्या घरापासून दूर जाऊन ऐतिहासिक,धार्मिक तसेच निसर्गरम्य स्थळांना भेटी देऊन आपल्या सुस्त मनाला तजेला आणण्याचा प्रयत्न करतो.अशाच गोष्टींचा विचार करून इतिहासप्रेमी तरुणाई ,धार्मिक व निसर्गप्रेमी पर्यटकांना महाराष्ट्राच्या गड किल्ल्याची,लेण्यांची,मंदिरांची,स्मारकांची तसेच सृष्टी सौंदर्याने  बहरलेल्या सागर किनाऱ्यांची इतिहास आधारे ओळख करून देण्याचा हा छोटासा प्रयत्न.
                     प्रस्तुत संकेतस्थळामुळे पर्यटकांना तसेच स्थानिक लोकांना अल्पसा जरी उपयोग झाला तरी श्रमसाफल्याचा आनंद आम्हास मिळेल. 
                                                                                                                                                                                                                                                                        --------------सुरेश किसन निंबाळकर